Siglir tar il cuntegn

Header

cuntegn

Chantun Damain morts sin las vias

Sin las vias dal chantun Grischun hai dà damain morts l'onn passà. Il dumber dals grev blessads perencunter è creschì. Quai resulta da la statistica d'accidents da l'uffizi federal dal traffic.

Il 2016 èn mortas 14 persunas tar accidents da traffic. Cumpareglià cun l'onn avant èn quai quatter damain. Il dumber dals blessads è creschì per 10% e quai sin 640.

Tut en tut hai dà 2288 accidents sin las vias grischunas, quai che correspunda a la media dals ultims tschintg onns.

Dapli accidents cun donn material e da persunas

S'augmentads èn tant ils accidents cun donn material (+3,5 %) sco er quels cun donn da persunas (+2 %). Var 10% dapli persunas èn vegnidas blessadas grevamain, quai en cumparegliaziun cun ils ultims tschintg onns. Cun totalmain 14 persunas disgraziadas mortalmain dastga vegnir cumprovada – en cumparegliaziun cun l'onn precedent – ina diminuziun da 4 (-22 %). Ina leva diminuziun hai dà tar ils accidents da traffic ch'èn vegnids chaschunads sut l'influenza da narcotics e da medicaments sco er tar ils accidents chaschunads pervia d'alcohol.

Damain accidents mortals cun motos

Il dumber dals accidents cun motos è s'augmentà levamain (+9 %) en cumparegliaziun cun l'onn avant. Entant ch'ins po constatar ina diminuziun tar las persunas disgraziadas mortalmain (-20 %), è s'augmentà il dumber dals motociclists blessads (+14 %). Er tar las persunas ch'èn sa blessadas en in accident cun velo u cun e-bike sto vegnir registrà in lev augment (+3 %). Entant ch'il dumber da pedunas e peduns blessads correspunda a quel da l'onn precedent, èn deplorablamain s'augmentads ils accidents mortals da traffic cun peduns.

RR novitads 11:00

Artitgels legids il pli savens