Ditg eri cler per Rosie Jörg: Ella na dat betg la vusch al republican Donald Trump ed era betg a la democrata Hillary Clinton. Ma, la fin finala saja ella tuttina sa decidida da dar la vusch a Clinton.
Jau dun la vusch a Clinton per evitar Trump.
Per Rosie Jörg saja quai incredibel ch'ina persuna sco Trump haja la schanza da vegnir nov president dals Stadis Unids da l'America. «El hassegia dunnas, el hassegia muslims, el vul construir in mir sin ils cunfins cun il Mexico». En quests muments sa turpegia ella dad esser Americana.
Ma, era Hillary Clinton na saja betg propi la persuna adattada sco presidenta americana. Era Hillary Clinton na para betg dad esser dal tut correcta, di Rosie Jörg. Sch’ins patratgi mo vid l’affera dad e-mails.
Bler contact cun l’America, ma la politica è tabu
La famiglia da Rosie Jörg viva anc oz en California. Ella ha era bler contact cun lezza. Ma sur dad in tema na vegn betg discurrì: la politica. Las nezzas sajan quasi tuttas fans da Trump. Sch'ellas discurrissian en famiglia davart las elecziuns, lura dessia quai mo dispitas.
Rosie Jörg sezza spera simplamain che Donald Trump na vegnia betg il successur da Barack Obama. Sche lez daventia president, lura na sappian ins simplamain betg, tge che schabegia, di Rosie Jörg.
RR actualitad mezdi 11:00