Siglir tar il cuntegn

Header

cuntegn

Chantun Guvernatur da Fukushima vul meglierar l'image da sia regiun

La situaziun en la regiun da Fukushima saja meglra che pensà. Quai ha ditg il guvernatur da Fukushima durant ina conferenza al WEF. Il pli impurtant saja uss da promover l'image da la regiun.

5 onns suenter la catastrofa d’atom a Fukushima è la situaziun sa calmada en la regiun. Mo anc 7% dal territori sajan dad evitar. Il rest saja puspè dà liber per viver, ha ditg il guvernatur da Fukushima. La gronda part da la glieud na turnia dentant betg enavos pli. Quels che turnian sajan plitost glieud pli veglia. La tema ed ils purtrets da la catastrofa sajan anc adina en ils chaus.

audio
Fukushima al WEF
ord RTR Audio dals 22.01.2016.
laschar ir. Durada: 3 minutas 1 Secunda.

Attrair ils giuvens

Per pudair garantir in futur a la regiun da Fukushima dovria dentant giuventetgna. Perquai saja il mument impurtant da pudair mussar il svilup che la regiun haja fatg.

Il guvernatur ha fatg in exempel:

Il prinzi William da l’Engalterra ha fatg ina visita a Fukushima. Ensemen cun il primminister dal Giapun ha el tschainà. Ina tschaina mo or da products da la regiun da Fukushima. Il Prinzi haja ditg che quella haja gustà.

Reparar ils donns da la catastrofa dat anc blera lavur:

  • Schubregiar l’aua contaminada
  • Promover l’industria, l’agricultura ed il turissem
  • Investir en las energias regenerablas
  • Porscher ina buna educaziun

Uschia vul Fukushima meglierar ses image.

Artitgels legids il pli savens