Sch'i dat proxim onn in nov uvestg u betg è anc avert. Cun ses 75avel anniversari è Vitus Huonder obligà da dar en la desditga a Roma. En cas usità vegn lura er tschernì in nov uvestg. Dentant hai era gia dà il cas, ch'il papa ha laschà en uffizi l’in u l’auter uvestg era suenter il 75avel.
E lura datti anc l'opziun d'in administratur apostolic. Causa che l’uvestgieu a Cuira ha adina puspè procurà per lingias grassas ha uss fatg il vicari general Martin Kopp la proposta da metter en uffizi in administratur apostolic enstagl d'in uvestg elegì da la catedrala capitala. Cunquai avess l’uvestgieu a Cuira ina regenza provisorica. Quella proposta vegn sustegnida da l'allianza «Es reicht!» «I basta!».
En sonda, ils 17 da december, ha Vitus Huonder gì in'audienza tar papa Francestg a Roma. Sch'els han discurrì durant quel termin da la dumonda da la successiun en l'uvestgia a Cuira n'è betg enconuschent - e na vegn strusch a vegnir enconuschent. Da quai ch'ins discurra tar in audienza cun il papa na discurr'ins para betg, uschia Giuseppe Gracia, il pledader da l'uvestg da Cuira.
RR novitads 17:00