Siglir tar il cuntegn

Header

video
Il luf po vegnir sajettà – El ha stgarpà 40 animals l'enviern
Or da Telesguard dals 22.03.2017.
laschar ir. Durada: 1 minuta 56 Secundas.
cuntegn

Chantun Il luf po vegnir sajettà

Il luf ch'ha stgarpà nursas en la Leventina, il Mesauc e la Bregaglia po vegnir sajettà entaifer 60 dis, quai communitgescha il chantun en ina communicaziun.

audio
Saira: Lubientscha per sajettar luf M75 – Co funcziuna quai?
ord Actualitad dals 22.03.2017.
laschar ir. Durada: 1 minuta 48 Secundas.

Tranter ils 21 da schaner ed ils 8 da favrer 2017 ha in luf stgarpà passa 40 nursas en la Leventina (TI) en la Bregaglia ed en il Mesauc. En trais cas ha il luf pudì vegnir identifitgà a Stampa, a Faido, ed a Cama, entras analisas geneticas. Igl è il luf M75.

Ina lubientscha per sajettar in luf po vegnir dada lura cura ch'il luf procura per donns considerabels vid animals da niz. In donn considerabel è lura avant maun cura ch'il luf stgarpa entaifer d'in mais dapli che 25 animals en ses territori, schebain che mesiras da protecziun per ils muvels èn vegnidas pigliadas. Donns che capitan sin il territori da dus differents chantuns ston las autoritads giuditgar communablamain. Il sajettar sto nizzegiar a la prevenziun d'ulteriurs donns als animals da niz.

Ils dus chantuns Tessin e Grischun han uss decidì communablamain da sajettar il luf M75. Questa lubientscha è dentant limitada sin 60 dis.

Grev da sajettar quest luf

Il grev vid la chaussa da sajettar quest luf M75 è ses sa cuntegnair tipic d'in luf che n'è betg staziunà. Quai munta numnadamain ch'el sa mova svelt e sur grondas distanzas. I saja perquai er pussibel che quest luf saja responsabel per las nursas stgarpadas ils 18 da favrer a Trun. L'agir intenziunà e planisà saja numnadamain consistent cun quel dal luf a Cama e Faido. Ord quest motiv vegn numnadamain sper il Mesauc e la Bregaglia er cumpiglià la Surselva en il perimeter per sajettar il luf.

audio
Bunura: Lubientscha da sajettar luf - Amez discussiuns politicas
ord Actualitad dals 23.03.2017.
laschar ir. Durada: 2 minutas 28 Secundas.

WWF deplorescha la decisiun

Il WWF Svizra deplorescha la lubientscha da sajettar il luf M75. Els n’hajan dentant anc betg decidì sch’els veglian sa dustar cunter questa decisiun. Quai ha il WWF Svizra confermà sin dumonda dal schurnal regiunal da radio SRF.

Els studegian ussa l’argumentaziun dals chantuns Grischun e Tessin – ed era quant bain che las nursas eran protegidas. L’emna proxima vul il WWF decider sch’el vul cumbatter la lubientscha da sajettar il luf M75 u betg.

RR novitads 15:00

Artitgels legids il pli savens