Siglir tar il cuntegn

Header

video
20 onns La Quotidiana
Or da RTR dals 06.01.2017.
laschar ir. Durada: 1 minuta 33 Secundas.
cuntegn

Chantun La Quotidiana vegn 20

Oz, ils 6 da schaner 2017, èsi exactamain 20 onns che l'emprima ediziun da la gasetta quotidiana rumantscha «La Quotidiana» è vegnida stampada.

La realisaziun è stada in zic sco ina bumba. Ord il nagut ha Hanspeter Lebrument, il manader da la chasa editura, decis, senza far lungas, da realisar ina nova gasetta rumantscha. La realisaziun da questa nova gasetta saja stada in’acziun da pumpiers, conceda Martin Cabalzar ch'è oz schefredactur. Entaifer 2 mais han indisch redacturs da las gasettas regiunalas elavurà il concept da La Quotidiana.

La realisaziun da La Quotidiana è stada in'acziun da pumpiers.
Autur: Martin Cabalzar schefredactur La Quotidiana

Ils 6 da schaner 1997 èn lura ils emprims 7500 exemplars vegnì squitschads. Il schaner 1997 lavuravan 12 persunas tar La Quotidiana.

audio
Mezdi: La Quotidiana – Ses svilup dals ultims 20 onns
ord Actualitad dals 06.01.2017.
laschar ir. Durada: 3 minutas 33 Secundas.

Midada da concept gia suenter 1 onn

L’idea oriunda era che La Quotidiana stoppia remplazzar ina gasetta tudestga, di Martin Cabalzar. I saja dentant sa mussà che quai saja ina illusiun. Las paginas cun las novitads internaziunalas e naziunalas èn vegnidas stritgadas. Il focus è vegnì mess sin temas ed occurrenzas regiunals. Plinavant èsi era vegnì cumenzà a sortir ils artitgels tenor regiun ed idiom.

Oz vegn la gronda part da la gasetta scritta da collavuraturs da l’Agentura da Novitads Rumantscha. Lezza garantescha uschia che la gasetta sa vegnir squitschada mintga di. Il dumber d’exemplars è ozendi tar bun 5000.

Ord l'archiv

Artitgels legids il pli savens