La Repower saja in grond producent d'energia, haja dentant relativ paucs clients (circa 85'000). Tar las ovras electricas dal chantun Turitg saja gist il cuntrari: Lezzas hajan ina pitschna producziun, dentant blers clients (circa 300'000). Perquai saja l'interess da la EKZ vid la Repower chapaivel, declera Armin Menzi. Tant pli che la Repower saja actualmain en la crisa e saja perquai «ina spusa relativamain favuraivla».
La dumonda saja tge cumpart che la Repower pudess vender a las ovras electricas dal chantun Turitg. La maioritad da las aczias (58%) s'auda al chantun Grischun ed i saja intschert sche lez veglia dar ord maun questa pussanza.
La Repower e las ovras electricas dal chantun Turitg han enfin ussa be confermà ch'i dettia discurs. Detagls davart ina cooperaziun n'han ils concerns betg vulì tradir.