Siglir tar il cuntegn

Header

video
Chatscha grischuna – tge che resta da la revisiun da la lescha
Or da Telesguard dals 18.10.2016.
laschar ir. Durada: 3 minutas 37 Secundas.
cuntegn

Chantun La revisiun da la lescha da chatscha è sut tetg

Il Cussegl grond ha approvà la revisiun cun resguardar ina part da las propostas fatgas da la regenza, uschia vegn la patenta da chatscha pli chara e la chatscha auta na vegn betg prolungada per quatter dis l'october. Refusà ha il parlament percunter d'introducir ina limita d'alcohol.

Nagina limita d’alcohol per chatschaders e chatschadras

Per chatschadras e chatschaders na datti nagina limita d’alcohol durant chatscha. Il Cussegl grond ha refusà da fixar en la lescha ina limita d’alcohol tenor la lescha per il traffic sin via, pia ina limita da 0.5 promils. Il resultat è stà cler cun 85 cunter 26 vuschs, tar 4 abstenziuns.

La patenta da chatscha vegn pli chara

Il Cussegl grond è percunter suandà a la maioritad da la cumissiun ed a la regenza. El ha decidì cun 64 vuschs gea tar 46 vuschs na e trais abstenziuns, che la patenta per la chatscha auta duai el futur custar 750 francs e betg pli 697 francs.

Nagina chatscha d'october

Avant n'ha l'idea per quatter dis da chatscha supplementars durant l'october gì nagina schanza en il Cussegl grond. Cun 101 cunter 14 vuschs e duas abstenziuns han deputadas e deputads refusà questa proposta. Deputadas e deputads èn suandads la proposta da la regenza e dal cusseglier guvernativ Mario Cavigelli.

L’idea per quatter dis da chatscha supplementars era vegnida dal chatschader e deputà liberal Christian Kasper. El vuleva proponer in’alternativa a l’iniziativa che vul abolir la chatscha supplementara – quella ha il cussegl grond valità sco nunvalaivla ed actualmain è ella pendenta tar il Tribunal federal a Losanna.

Entant han però er ils chatschaders en il Cussegl grond midà opiniun ed eran cunter lur idea oriunda d’introducir quatter dis da chatscha supplementars l’october.

Patenta per giasts

Aifer la revisiun da la lescha da chatscha ha il Cussegl grond era decidì d'introducir ina patenta per giasts. Quai vul dir, ch'in chatschader grischun dastga envidar in chatschader d'ordaifer per ir in di da chatsch'auta.

In'ulteriura midada pertutga la chatscha cun traplas: Da nov èsi scumandà en il Grischun da pigliar animals cun traplas. Mo il guardiachatscha dastga far diever da quellas, p.ex. sch’igl è memia malsegir da sajettar animals datiers da vitgs.

RTR novitads 11.00/17:00

Artitgels legids il pli savens