Siglir tar il cuntegn

Header

cuntegn

Chantun La Selva n’è betg cuntenta cun ils chatschaders grischuns

Per l'associaziun dals proprietaris da guaud dal Grischun n’ha la chatscha auta da quest onn betg purtà in bun resultat.

La Selva sa fa quitads per ils guauds da protecziun. Els pateschian da l’aut effectiv da selvaschina, scriva l’associaziun.

Giu cun els – per la Selva è la chatscha speziala necessaria

Cun 3’501 tschiervs ch'èn vegnids sajettads saja il dumber bain en il rom dals davos onns. Cumpareglià cun ils gronds effectivs da tschiervs na bastia quai dentant betg, scriva la Selva vinavant.

Perquai intuna ella l’impurtanza da la chatscha speziala e beneventa, ch’il chantun vul laschar sajettar anc 1’817 tschiervs e 507 chavriels. Era sche quellas cifras èn marcantamain pli autas ch’ils auters onns saja quella reducziun necessaria per il guaud.

Donns remarchabels vi dals guauds da protecziun

La primavaira passada era vegnì stimà ch'enturn 16'500 tschiervs vivian en il Grischun. Per il guaud grischun na para quella cifra betg supportabla: Uschia scriva la Selva che la cifra auta da tschiervs e chavriels saja tranter auter responsabla per la «situaziun da regiuvinaziun alarmanta dal guaud» e surtut per quella en ils guauds da protecziun.

Ils tschiervs èn memia fritgaivels

Questa bun’ura aveva publitgà l'uffizi da chatscha e pestga dal Grischun las cifras da la chatscha da quest onn. Medemamain ha el dà enconuschent quants tschiervs e chavrieuls che han anc da vegnir sajettads en la chatscha speziala da quest onn.

La realisaziun da la planisaziun da chatscha è indispensabla.
Autur: Georg Brosi inspectur da chatscha

Cun quai ch’ils tschiervs sa reproduceschan ferm, creschia lur cifra da primavaira fin atun per bundant in terz. Per ils tschiervs signifitgass quai in augment da var 5’000 animals. Per pudair adattar la cifra dad animals a lur quartiers d'enviern ed evitar il medem mument che la cundiziun dals animals daventia pli flaivla, saja indispensabel da reducir la cifra dad animals.

Per la chatscha speziala 2016 èn s'annunziads tenor l’uffizi 3’078 chatschadras e chatschaders (onn precedent: 2923). Quai sajan tantas e tants sco anc mai.

RR novitads 16:00

Artitgels legids il pli savens