Libertad munta per mintgin insatge auter

Il teater da Cuira preschenta quest onn passa 40 preschentaziuns sut il tema libertad. Cun in budget dad 1,9 milliuns francs vulan ins en ils proxims 12 mais divertir giuven e vegl.

Ils responsabels dal teater Cuira preschentan il program per la stagiun 2017/18. Bild in Lightbox öffnen.

Legenda da maletgs: Ils responsabels dal teater Cuira preschentan il program per la stagiun 2017/18. RTR, Gian-Marco Maissen

Per la nova stagiun datti 150'000 francs dapli. L’augment da budget va en la promoziun dal public da teater dal futur. La giuventetgna.

Uschia vulan ins era quest onn puspè ir en las classas e far ensemen cun scolaras e scolars agens tocs che vegnan lura era preschentads a Cuira. Las classas annunziadas survegnan lura era sustegn professiunal da pedagogs da teater. L’onn passà èn gia bunamain 20 classas sa participadas al project. Quest onn duess quai dumber anc crescher. Uschia la speranza dals organisaturs dal festival da teater per giuvnas e giuvens.

Libertad, quai il tema per la stagiun 17/18. Bild in Lightbox öffnen.

Legenda da maletgs: Libertad, quai il tema per la stagiun 17/18. G-M Maissen

Faust, il barbiere di Siviglia ed istorgias alpinas

Il program è era quest onn puspè vast. Dad operas, sur dramas e sauts fin teaters da figuras e teaters tradiziunals. Uschè vegn ins a vesair classichers sco per exempel Faust da Johann Wolfgang von Goethe u er il barbiere di Siviglia da Gioachio Rossini. Plinavant pon ins er sa legrar d’in eveniment sur plirs dis che s'occupa cun las ditgas e famas alpinas. Quai cun concerts, prelecziuns ni era referats scientifics. Las occurrenzas vegnan ad avair lieu en differents lieus a Cuira e quai dals 22 fin ils 24 da settember.

Program alternativ durant il campiunadi mundial da ballape 2018

Durant ils ultims dus gronds turniers da ballape il 2016 ed il 2014 è il teater da Cuira mintgamai vegnì zuppenta d’ina gronda arena per guardar ballape communablamain. Per il proxim turnier, il campiunadi mundial en Russia 2018 vul il teater da Cuira porscher in rapport da sport alternativ.Quai pudessan esser gieus commentads da persunas or da la scena da cultura. Detagls pli exact seguan dentant anc.

In punct ch’è dentant gia fix è la preschentaziun KUBI. In toc che s’occupa cun l'anteriur giugader da l’equipa naziunala svizra da ballape Kubilay Türkyilmaz. Il ferm attatgader è in idol a Bellinzona. Il toc gioga il 1996 durant il campiunadi europeic. La mamma da Kubilay stat cun amias avant la televisiun e guarda la partida legendara d’avertura tranter l’Engalterra e la Svizra. Las emoziuns e discussiuns avant televisiun quintan da problems, rassissem e la vita da mintgadi da quella vista. Il toc vegn preschentà ils 13 da zercladur 2018.

RR actualitad 17:00