Naginas indicaziuns n'haja la regenza er betg fatg tar las «lingias cotschnas» ch'ella hajan pretendì da l'IOC che saja sensibels per corrupziun. Entant sajan ils blers daners dal chantun enfin uss culads en las cassas da la firma «Infront Ringier» a Zug.
La regenza grischuna haja incumbensà l'organisaziun tetgala da l'economia grischuna cun elavurar il concept per gieus olimpics en Grischun. Quels hajan dà enavant l'incumbensa ad Andreas Wieland, il CEO da la Hamilton a Panaduz. Plinavant haja lez arranschà in team principal che survegnia ina paja da 250 francs l'ura.
Ils daners da la taglia giajan a Zug
La pli gronda part dals daners dal chantun, numnadamain 245'000 francs giajan tenor la PS grischuna ad «Infront Ringier» cun sedia a Zug. 30 paginas dal concept da basa duain quels avair elavurà, tenor Jürg Michel, directur da l'uniun d'artisanadi e mastergn grischun. Quai sajan lura 8'166 francs per pagina. Pajà quai hajan ils pajataglias dal Grischun. Quels na dastgian dentant betg leger il concept perquai che quel saja secrets.
La campagna electorala dals promoturs vegnia plinavant manada davent da Turitg. Responsabel saja la fatschenta turitgaisa «Müller Consulting & Partner».
La PS n'è betg cuntenta
Il facit che la PS tira è ch'i na dettia nagina transparenza e clerezza. Persuenter la tschertezza ch'il Grischun haja da pajar ed il lobbyists da Zug e Turitg incasseschian. Uschia saja il Grischun betg pront per gieus olimpics.
RR novitads 11:00