«Dentant suenter uschè ina stad da chalira fetschia in zichel plievgia bain», di Silva Semadeni, candidata per il cussegl naziunal da la PS. Ella è gia avant 4 onns ed avant 20 onns vegnida elegida en il cussegl naziunal.
Gudagnar in segund sez
La PS na vul dentant betg mo che Silva Semadeni vegn reelegida, mabain era anc tschiffar in segund sez. Tenor Semadeni duess quai esser pussaivel entras la ferma glista da la PS ed entras la colliaziun cun la Partida verd-liberala. Cun questa colliaziun pudess la PS rimnar dapli vuschs che la PPS ed uschia evitar in segund politicher da la PPS grischuna en il cussegl naziunal.
Per survegnir in segund sez na sto la PS dentant betg mo far ensemen cun ils Verd liberals dapli vuschs che la PPS, mabain era cumbatter la colliaziun da glista dals burgais PCD, PLD e PBD. Ed er il partenari en l'atgna colliaziun, Josias F. Gasser da la Partida verd-liberala, èsi da dumagnar.
Sustegn da Christian Levrat
Sustegn per lantschar il cumbat electoral a Cuira han ils candidats da la PS era survegnì dal president da la PS Svizra Christian Levrat. El ha ludà la PS Grischuna sco ina da las secziuns da la PS da l'entira Svizra cun il pli bler success.