Questa dumonda ha il Minisguard vulì sclerir. L'impuls ha dà la novitad da la California che las autoritads han stuì evacuar millis da persunas. Ferma plievgia aveva procurà ch'in grond mir da fermada n'era betg pli segir e periclitiva ina regiun cun blers abitants.
En la California hai pluvì uschè fitg, che l’aua en il lai da fermada Oroville va sur ils mirs ora. Perquai ch’il mir vegn donnegià uschia, han bunamain 200’000 persunas stuì bandunar lur chasas. Fiss quai era pussaivel tar nus e tge fan ins en il Grischun en uschè ina situaziun? Il Minisguard è sa mess sin via per chattar ina resposta.
