Sfidas pervi da l'aura extrema

La midada dal clima è fatg e che l'aura sa mida er. Per part daventa ella er pli extrema cun ferms urizis, chalurs e pauca naiv. Perquai ston cunzunt purs e turistichers chatta novas strategias per vinavant avair success.

La bova a Scuol la stad 2015. Bild in Lightbox öffnen.

Legenda da maletgs: La bova a Scuol la stad 2015. Keystone

Gievgia saira ha l'assicuranza d'edifizis dal Grischun envidà ad ina saira da referats. Il tema: Aura extrema. Ils referents: Thomas Bucheli e David Bresch. Ferms urizis, chalurs, pauca naiv, sitgiras la stad e scheliras la primavaira – gugent vegni dà la culpa a la midada dal clima. Quai na possia ins dentant betg adina, manegia il meteorolog dad SRF Meteo, Thomas Bucheli. Igl è dentant fatg che l'aura sa mida e ch'i dat ina midada dal clima. Quella porta er novas sfidas cunzunt per purs e turistichers.

Novas strategias e nischas

Quels stoppian guardar da chattar novas strategias, quai di l'auter referent da la saira, David Bresch. El è professer per scienzas d'ambient a l'ETH a Turitg. Ed el è persvas ch'i saja per tuts pussaivel da chattar soluziuns.

Ils turistichers stoppian sa dumandar tge ch'il giast vul – forsa vul el en il futur vegnir la stad en ils culms per fugir da las chalurs en la bassa enstagl da vegnir cun skis l'enviern.

In zic pli cumplitgà saja quai tar ils purs, quels stoppian guardar fitg exact tge via ch'els veglian ir. Il viticultur en la Val dal Rain haja autras sfidas ch'il viticultur a Schaffusa, perquei na saja quai betg pussaivel da far in recept da patent che valia per tuts. Tge che valia dentant per tuts, turistichers sco er purs, saja d'analisar la situaziun e guardar da s'adattar a las novas sfidas ch'il clima portia – saja quai sitgiras, auas grondas u pauca naiv.

RR actualitad 07:00