Siglir tar il cuntegn

Header

cuntegn

Chantun Sistem electoral grischun va a Losanna

Il sistem electoral da maiorz per las elecziuns parlamentaras en il Grischun sto vegnir examinà dal Tribunal federal a Losanna. La gruppa da var 30 burgaisas e burgais grischuns èn sa decidids dad ir avant il Tribunal federal.

Il sistem electoral da maiorz vertent violeschia a moda extrema il principi da l'egualitad. Uschia il maini da la gruppa da burgais. Sco il Cussegl grond vegn elegì en il Grischun correspundia betg a l’egualitad da quota da vuschs. En il circul da Cuira dovri per exempel da quai da 2300 vuschs per in sez en il parlament chantunal, en il circul d’Avras tanschan gia 70 vuschs.

«Chaussa decidida»

Quai saja ina chaussa decidida ha ditg Anita Mazzetta da la glista libra Verda a l’agentura da pressa SDA. Mazzetta è ina da quellas 30 persunas ch'avevan purtà il 2014 plant cunter las elecziuns parlamentaras pervi da violaziun dal dretg da vuschar ed eleger. I era quai plant a sias uras avant il Cussegl grond sez. Lez aveva dentant constatà e decidì, ch’el na saja betg cumpetent en questa dumonda.

Betg l’emprim sistem electoral crititgà dal Tribunal federal

Pervia da l’inegualitad da quota da vuschs ha il Tribunal federal a Losanna gia crititgà ils sistems electorals da plirs chantuns da la Svizra centrala, tranter auter quels da Zug, Sviz e da la Sutsilvania. Il sistem da maiorz vegn dapi intgins onns cumbattì era da vart politica en il Grischun. Uschia vulan tant ils Socialdemocrats (PS) sco era la Partida Populara Svizra (PPS) midar il sistem da maiorz vi al sistem da proporz. En las ultimas elecziuns dal Cussegl naziunal l’october 2015, in’elecziun en il sistem da proporz, ha la PPS dal Grischun fatg quasi 30% da las vuschs. En il Cussegl grond ha la PPS dentant be 9 da 120 sezs.

RR novitads 14:00

Artitgels legids il pli savens