Suisse Quiz – Tgi enconuscha il meglier la Svizra?

Quants pizs da passa 4000 meters datti en il Grischun? Co ha num la punt famusa a Lucerna? Nua datti il renumà festival da jazz? Las primas chadainas dals radios da la SRG SSR tschertgan questa stad la persuna ch’enconuscha il meglier la Svizra, sia geografia, ses usits, sias atgnadads e sia glieud.

Laschar ir video «Per exempel quai stoss savair …»

Per exempel quai stoss savair …

1:01 min, dals 8.6.2017

Mintga regiun linguistica ha tschertgà candidats e candidatas per la preselecziun regiunala. Era RTR ha tschertgà candidatAs. Sin basa da las annunzias partan al Suissequiz per la Svizra Rumantscha las suandontAs candidatAs:

  • Erna Sewer (Domat)
  • Daniel Wäger (Cuira)
  • Casper Deflorin (Mustér)
  • Eugen Caduff (Trimmis)
  • Beat Gabriel (Panaduz)
  • Mario Dietrich (Panaduz)
  • Reto Schmid (Sedrun)

QUALIFICAZIUN – Tgi en il Grischun enconuscha il meglier la Svizra?

La qualificaziun per il final dal prim d'avust succeda l'emna che vegn – cun quizzar. A partir dals 26 da zercladur mintgamai tranter las 08.00 e las 09.00 en il Radio Rumantsch quizzeschan candidatas e candidats in encunter l'autra. Il u la victura va per la Svizra Rumantscha al final.

FINAL – Tgi en l'entira Svizra enconuscha il meglier la Svizra?

Il final vegn lura giugà il prim d’avust 2017 l’avantmezdi en la chasa da medias da la chasa federala a Berna. Là sa mesira il u la candidatA rumantschA cun ils 3 candidats da las autras regiuns linguisticas. I va per l'onur e per in premi en la valita da 5’000 francs.

Il grond final vegn emess mardi, il prim d’avust l’avantmezdi da las 10.00-11.00 en l’entira Svizra, pia tar il Radio Rumantsch, RTS La Première, RSI Rete Uno ed SRF 1. Moderada vegn l'emissiun per RTR da Ladina Schena e dad Annina Campell.

ONLINE – Tgi sin l'entir mund enconuscha il meglier la Svizra?

A partir dals 26 da zercladur datti sin rtr.ch supplementarmain anc in Suissequiz online cun dumondas da tut gener sur da la Svizra. Participaziun via clic. Là po in victur u ina victura gudagnar 1’500 francs.