Dapi bunamain 30 onns lavura Imelda Grisch sco manadra da viadis e prenda a Cuira giasts indigens u d'ordaifer cun sin differentas guidas. Ina da quellas è la «SAGENhafte Abendführung», nua ch'i va per las ditgas veglias da la citad. Las visituras ed ils visiturs suondan la guardia da notg che raquinta sin in gir tras las giassas da temps passads.
La lavur sco guardia da notg era pli baud tut auter che simpla, sco che Imelda Grisch raquinta. Els han gì da survegliar las portas da la citad, da guardar per quietezza ed urden sin las vias e da dar tras il temp da l'ura. Gudagnà han els mo fitg paucs daners per quest lavur, vitiers eran els malvis tar il pievel – pli nunpopular eran mo pli il hentger ed il chavafossas.
Il pievel da notg è l'enfiern per nauschas olmas da Cuira
Pli baud na saja la glieud sche pussaivel betg ida giuadora en il stgir, perquai ch'ins avess pudì entupar in fenomen terribel – il pievel da notg. Quai è in til da persunas ch'èn mortas e che va malruassaivel tras las gassas da la citad. E tut a la fin da quest til chamina in carstgaun che viva anc, e lura san ins, che quel ha da murir sco proxim.
Sco Imelda Grisch, ina dunna da 75 onns suppona, ha Cuira vitiers er ses agen lieu per las olmas d'umans che han commess putgads en lur vita. En il Scaläratobel, ina val en il guaud a l'ur da la citad, inscuntr'ins cunzunt la notg tut las sorts da creatiras inquietantas. Tranter auter datti in anteriur commerziant da vin, ch'ha pinà durant sia vita ses vin cun aua per far dapli profit, e ch'è ussa spussà da baiver aua fin en l'entira eternitad. I sa chatta era in giugadur da chartas, ch'è stà passiunà dal gieu da fortuna empè da s'occupar da sia famiglia, ussa patescha el en il Scaläratobel, e sto mangiar per adina cartas da jass.
Detagls zuppads en la citad veglia
Supplementarmain ad ina gronda schelta da ditgas ed istorgias che fan sgarschur, mussa Imelda Grisch a sias visituras ed visiturs er in pèr detagls interessants da la citad veglia, che na dattan strusch en egl en il mintgadi. Uschia sa chatta en il Fontanapark tut discret in modest crap da fossa, e inquala figura da ditga ornescha anc sco purtret ina paraid d'ina chasa da la citad veglia.
Or da l'archiv:
La Rumantschia ha millis ditgas. Radiotelevisiun Svizra Rumantscha ha filmà en mintga idiom ina.
