Il cussegl da la citad da Cuira ha envidà mesemna saira ad in'occurrenza d'infurmaziun davart il nov local da consumaziun. Quel duai anc adina vegnir construì a la Sägenstrasse 75. Quai per gritta da blers abitants. La cuminanza d'interess «Kein Konsumraum Sägenstrasse» tema conflicts cun ils toxicomans ed ina periclitaziun d'abitants e d'uffants sin via a scola. Per la cuminanza finescha la saira en moda dischillusiunanta. Ella na sa senta betg udida e banduna baud l'occurrenza.
Jau na poss betg pli tadlar co ch'ins repeta adina puspè ils medems pleds. A nus ans resta be d'esser dischillus.
Patrick Degiacomi, cusseglier da la citad da Cuira, chapescha la malaveglia dals abitants, è però dentant er conscient da sia incumbensa ed el sa stenta da realisar quella uschè bain sco pussaivel. In meglier lieu n'han ins fin ussa betg pudì chattar ed il lieu saja adattà meglier ch'il Stadtpark.
Concept cun containers da construcziun
La sairada èn era vegnids preschentads ils plans da construcziun. La surfabricaziun consista da 25 containers. Otg per il local da consum e 17 per il post da cussagliaziun. La construcziun vegn budgetada cun 3,9 milliuns francs. Davart il credit general decidan las votantas ed ils votants da Cuira ils 9 da zercladur.
