Uvestg Vitus Huonder è mort suenter ina curta malsogna, scriva la confraternitad da Pius X. Huonder ha passentà ils ultims onns en l'institut Santa Maria a Wangs, nua ch'el è mort la mesemna. El aveva stuì ir en l'ospital chantunal a Cuira ils 19 da mars.
Sepultura en il Vallais
Durant ses davos dis ha l'uvestg emerità Vitus Huonder gì visitas da l'uvestg Joseph Maria Bonnemain. Sco che l'uvestgieu da Cuira ha communitgà, haja il uvestg anc ina giada dumandà Vitus Huonder sch'el restia tar sia decisiun, da betg vulair vegnir sepulì a Cuira. L'uvestg emerità veglia vegnir sepulì en vischinanza da l'uvestg Marcel Lefebvre ad Ecône en il Vallais.
Vita e controversa
Huonder è naschì e creschì si a Trun. L'avrigl avess el gì 82 onns. El ha fatg il gimnasi a Mustér e studegià filosofia e teologia a Nossadunnaun, Roma e Friburg. Il 1971 è el vegnì ordinà ed ha lavurà en differentas plaivs da l'uvestgieu da Cuira. Huonder è stà dal 2007 fin 2019 uvestg da la diocesa da Cuira.
El valeva sco fitg conservativ ed è s'exprimì differentas giadas cunter l'omosexualitad. Durant in referat en Germania aveva Huonder cità pliras passaschas or da la bibla nua che l'omosexualitad vegnia chastiada cun la mort – quai ch'aveva chaschunà nauschas reacziuns.
Pliras persunas avevan purtà plant cunter el. Huonder era s'exculpà persuenter. El saja vegnì malchapì.
