Ils pleds dal president da l’Associaziun grischuna da proprietaris da chasa, Thomas Hess, èn stads clers: la taxaziun dals proprietaris d’abitaziuns e chasas cun entradas artifizialas tar la valur da l’atgna locaziun stoppia finalmain smetter. Ils proprietaris che stettian en lur atgna chasa u abitaziun stoppian, cun la valur da l’atgna locaziun, pajar taglias per entradas teoreticas. Quai na saja betg gist, scriva l’Associaziun.
Era l'associaziun naziunala è activa
L’APC Svizra, l’Associaziun svizra dals proprietaris da chasa, haja surdà ina petiziun a la Chanzlia federala che vul era stritgar la valur da l'atgna locaziun. Quai mussia ch'ina soluziun saja necessaria.
A la 35avla radunanza da delegads a Scuol eran tranter auter preschents sco giasts era il president dal Cussegl grond grischun Michael Pfäffli, la presidenta da la regenza grischuna Barbara Janom-Steiner ed il cusseglier naziunal grischun Heinz Brand.
RR novitads 21:00