Davent dal venderdi enfin la dumengia pon persunas avertas per la cardientscha catolica s'inscuntrar tar la catedrala da Nossadunna d'ascensiun sur la citad da Cuira. Quest onn èn radund 500 persunas da l'entira Svizra da la partida.
La motivaziun d'ir al di mundial da la giuventetgna
Per las trais sursilvanas Anna Giuseppa Decurtins, Sarina Venzin e Maria Coray èsi stà cler ch'ellas sa participeschan a l'inscunter. Il pli bel saja la cumpagnia, dian ellas. I saja auter che sch'ins giaja uschiglio a messa. La cuminanza giuvna, il chant e la bella atmosfera saja quai che fetschia questa occurrenza uschè plaschaivla. Plinavant saja era bel che mintgin e mintgina saja bainvegnì, di Anna Giuseppa Decurtins. Quai vul dir: Persunas fitg cartentas ma era talas che haja simplamain interess vi da la religiun.
Ins vegn immediat prendì si, tut tuttina sch'ins enconuscha insatgi u betg. La glieud salida ed ha interess d'emprender d'enconuscher tai.
Che betg tuts giuvenils hajan uschè in ferm liom tar la cardientscha sco els, da quai sajan els pertscherts. I na saja nagin problem sch'insatgi na possia betg s'identifitgar cun il tema religiun e cardientscha. Chapientscha hajan els era per persunas che sajan extradas da la Baselgia pervia dals cas d'abus sexual. Ma per els na sajan quai nagin'opziun:
I fa mal d’udir da quels cass ch’èn succedids, ma da simplamain mussar il dies a la Baselgia, quai fiss memia simpel. Jau na sai betg renunziar a quella instituziun ch'ha documentà uschè bler dals davos 2'000 onns e dir che tut quai che la Baselgia haja fatg saja stà fauss.
Sper diversas messas e la vigilgia datti concerts, referats e workshops tar differents temas e las participantas ed ils participants pon sa barattar in tranter l'auter. L'occurrenza è da principi gratuita, ma ins po dar in contribuziun da solidaritad. Quels che na pon betg ir a chasa durant ils trais dis restan a Cuira tar famiglias ospitantas.
