Siglir tar il cuntegn

Header

cuntegn

Engiadina 800'000 francs da Segl e Silvaplauna per schanza a San Murezzan

Segl e Silvaplauna vulan sustegnair la schanza da siglir cun skis a San Murezzan cun in import unic dad 800'000 francs

Las suprastanzas da Segl e Silvaplauna han decidì da vulair sustegnair la schanza da siglir cun skis a San Murezzan en tut cun 800'000 francs. Segl vuless dar 300'000 francs e Silvaplauna 500'000 francs.

audio
Saira: 800'000 francs per la schanza da siglir cun skis a San Murezzan
ord Actualitad dals 29.07.2016.
laschar ir. Durada: 3 minutas 22 Secundas.

Las radunanzas communalas han anc da decider davart ils imports. Per ils presidents communals Christian Meuli e Claudia Troncana èsi impurtant da trametter in signal da collavuraziun regiunala a la vischnanca vischina da San Murezzan. Il project saja ussa concret e realisabel, perquai stoppia ins uss gidar a San Murezzan da pudair construir la schanza che saja impurtanta per il turissem.

Plaschair discret

La vischnanca da San Murezzan reagescha cun plaschair discret. il president communal Sigi Asprion ha ditg envers RTR ch'i saja bel che ils vischins veglian gidar. Per San Murezzan na fiss dentant in na al credit supplementar dad 8.4 milliuns francs betg la fin dal project. Lura fissi tenor Sigi Asprion pussaivel da lantschar la schanza da siglir cun skis sco project regiunal.

San Murezzan aveva concedì in credit da passa 11 milliuns francs per ina nova schanza da siglir cun skis. Pli tard era dentant vegnì cler che la schanza custa bler dapli, numnadamain radund 20 milliuns francs. La vischnanca da San Murezzan votescha probablamain il settember davart il credit supplementar dad 8.4 milliuns francs.

RR actualitad 18:00

Artitgels legids il pli savens