Siglir tar il cuntegn

Header

cuntegn

Engiadina 85 onns Jacques Guidon

Il pictur e caricaturist, scriptur da teater e liricher po festegiar ils 22 da fanadur 2016 ses 85avel anniversari: quai da buna sanadad ed anc adina plain spiert e passiun per tut sias lavurs.

audio
Intervista d'anniversari cun Jacques Guidon
ord Actualitad dals 22.07.2016.
laschar ir. Durada: 6 minutas 49 Secundas.

Naschì e creschì si è Jacques Guidon en ina famiglia da pur a Zernez. Là viva l’artist oz cun sia dunna Eva a l’ur da la vischnanca. Sper sia via artistica en la pictura, scriva el er curtas columnas. Ses pensar critic ed avair il ristg da metter insatge en dumonda, ha il politicher anc adina.

Jau hai empruvà da taschair, ma i na va betg!
Autur: Jacques Guidon anteriur magister secundar, artist e scriptur.

Durant ils mais da stad lavura Jacques Guidon gugent en ses atelier ed è actualmain vi da finir ina trilogia per sia proxima exposiziun a Madulain. Tipic èn oz cumposiziuns da colurs tar ses maletgs, entant ch’el duvrava pli baud savens la colur naira e grischa per s’exprimer e reflectar ses pensar critic.

Lingua rumantscha stat a cor

Enconuschent è il pictur ed artist er sco represchentant fervent da la cultura rumantscha. Uschia ha il giubilar gia scrit numerus tocs da teater, per part er gieus libers, che s’occupan da la societad en general. Il 1971 aveva Jacques Guidon fundà ensemen cun amis la gasetta satirica «Il Chardun».

En occasiun da ses 85avel anniversari preschenta l’artist sias pli novas ovras en ina exposiziun a Madulain. La vernissascha ha lieu ils 29 da fanadur 2016 en la Galeria La Suosta a Madulain.

Artitgels legids il pli savens