Actualmain n’è la temperatura betg pli in tema tar ils responsabels dal Bobrun a San Murezzan. Il campiunadi mundial da bob e skeleton po numnadamain vegnir manà tras uschia sco planisà.
Avant radund duas emnas e mez, in purtret dal tuttafatg auter. Causa temperaturas blerun memia autas durant l’enviern era il chanal da glatsch natiral serrà.
Cundiziuns ch’èn en sasez enconuschentas. Fasas pli chaudas haja quai numnadamain adina puspè dà, saja quai durant la fabrica dal chanal da glatsch ubain era durant la gestiun da la bobera. Il spezial saja dentant quest onn stada la durada da radund 14 dis en fila cun temperaturas atgnamain memia autas durant l’enviern.
Ina sfida ed oravant tut ina gronda malsegirtad betg mo per ils gestiunaris da la bobera, dentant era per ils organisaturs dal campiunadi mundial.
Bobera natirala vs. bobera artifiziala ubain adattaziun da la stagiun?
Schebain ch’ina bobera artifiziala era gia avant onns ina giada ina tematica, è il tenor tranter tut ils responsabels cler: Ina tala idea na vegn n’èra betg ad esser in'opziun da preschent.
Ins vul mantegnair numnadamain l’exclusivitad da l’unica bobera natirala sin quest mund e quai per tut pretsch. Era l’idea dad entschaiver la stagiun pli tard na saja actualmain anc betg vegnì discussiunà pli profund tar ils responsabels. Per l'ina na datti betg la garanzia ch’ins pudess insumma evitar uschia fasas da temperaturas pli autas durant l’enviern e da l’auter maun sperian ins simplamain ch’il schaner da quest onn na saja betg stad la regla en avegnir, mabain l’excepziun.