Ils custs per organisar in tal campiunadi sajan enorms, surtut er en vista al privel per attatgas da terror. In quart milliun dovria quai sulettamain per augmentar il dumber da policists. In mez milliun sajan calculads per dapli infrastructura. Era per il traffic public stoppian ins quintar cun 500'000 francs dapli che previs.
Sut il stritg quintan ils organisaturs ch'i hajan actualmain 1,4 milliuns francs memia pauc en cassa. Quai empè dals 900'000 francs ch'eran oriundamain calculads sco deficit.
Quai ha confermà il president dal campiunadi mundial da skis Hugo Wetzel.
Inoltrà ina dumonda per garanzia da deficit
Ils organisaturs dal campiunadi mundial da skis a San Murezzan han perquai inoltrà ina dumonda per ina garanzia da deficit al parlament d'Engiadin'Ota ed al chantun. Els avessan gugent da mintgin 250'000 francs, pia tut en tut in mez milliun.
Tenor Hugo Wetzel na stopp'ins ussa dentant betg temair in fiasco finanzial. La dumonda per ina garanzia da deficit saja en prima lingia ina mesira da precauziun. Quai tar ina occurenza ora en il liber nua ch'ins na possia mai esser segir sche tut funcziuna pervia da l'aura. Sche tut va da maniera optimala quinta Wetzel cun in quit egualisà. Il budget total dal campiunadi mundial da skis munta a 65 milliuns francs.
Il parlament d'Engiadin'Ota discutescha mez december davart questa dumonda.
RR novitads 14:00