Cun ir a pestgar en l’En en vischinanza da S-chanf ha Daniel Gianola pudì observar la dumengia saira in castur. L’emprim mument ha el pensà ch'in toc lain noda giu per l’En. Fitg svelt ha el però badà che quai è in castur. El ha pudì far anc trais fotografias e lura è il castur scappà.
Tenor las autoritads da chatscha e pestga è questa preschientscha d’in castur insatge nov per ellas. Il guardiaselvaschina Gian Fadri Largiadèr da Cinuos-chel conferma dentant che sin las fotografias saja in castur. El n'aveva betg fatg quint uschè svelt cun il return dal castur, però surprais n'è el betg cunquai ch’ins sa che casturs pon far grondas distanzas en pauc temp.
Derivanza
Dapi nov onns pon ins observar en vischinanza da Scuol in fin dus casturs e quai èn radund 40 kilometers davent da S-chanf.
Ils davos mains han ins observà in castur tranter Scuol e l’Engiadin’Ota si per l’En. Probablamain saja quai il medem castur ch'è ussa arrivà en Engiadin’Ota, declera il guardiaselvaschina Curdin Florineth da l’Engaidina Bassa. El suppona ch'i sa tracta d’in castur giuven masculin en tschertga d’in nov territori. Sche l'Engiadin’Ota al plascha poi dar ch’el resta, però i po era dar ch’el svanescha uschè svelt sco ch’el è rivà.
Ils casturs da l’Engiadina derivan cun fitg gronda probabilitad da la populaziun tirolaisa e quella populaziun deriva da la populaziun en la Baviera. Là vev’ins reintroducì il castur l'onn 1970 en l'En.
RR novitads 11:30
