Il Chalandamarz da Lavin cuzza il pli ditg
A Lavin cuzza il Chalandamarz fin gievgia, ils 6 da mars. Ils 50 uffants da Lavin e da Susch van tradiziunalmain da plazza a plazza e da chasa a chasa. La sonda saira è lura il ballin, dumengia vani anc ina giada cun las brunsinas tras la vischnanca. E quai va lura fin la gievgia saira. In mantun lavur datti fin gievgia saira er per la mamma dal Chalandamarz. Lezza ha ina rolla fitg impurtanta a Lavin. Quai è la mamma dal buob il pli vegl da la 9avla classa. Quella procura ch'ils uffants pon baiver e mangiar fin la gievgia saira.
Gruppa sursilvana da viadi en l'Engiadina
Ina gruppa sursilvana fa il viadi per guardar la tradiziun engiadinaisa, entant è la gruppa arrivada a Zuoz. Mathilda Derungs ch'è ina dad ellas raquinta ch'ella saja fitg surstada da quai che capita qua ed er quants uffants che quai èn cun questas grondas stgellas.
Il viadi cun bus è organisà da la redacziun da la Surselva. Las Sursilvanas e Sursilvans han fatg l'emprim stop a Silvaplauna nua ch'i han survegnì ina guida da la redactura da l'Engiadina Anna Caprez. Lura vai vinavant a Zuoz nua ch'i guardan l'act final dal Chalandamarz e suenter vegn gentà spezializads engiadinaisas.
Ils giasts da la Surselva a Guarda
Ils Sursilvans e la Sursilvanas èn arrivai a Guarda nua che uffants entschaivan a sa metter en moviment. Massa glieud èn al lieu. Las cumpognas ed ils cumpogns da la Surselva èn repartì tranter ils aspectaturs e spetgan sin il act final, nua ch’il uffants van cun las plumpas enturn la funtauna. In maletg tipic che bain inqual in po enconuscher ord films u cudeschs da Uorsin. L'atmosfera saja fitg impressiunanta, la canera, las colurs, la blera glieud fan ch'il Chalandamarz è ina tradiziun unica.
Ils 5 uffants da Tschlin rimnan dultscharias
A Tschlin è spezial che qua van ils uffants dad isch tar isch per dultscharias. En tut èn quai dentant be tschintg uffants, uschia ch'i saja grev da far in cortegi persul, ha il mattet Gian-Marco Horber declarà a noss redactur. Perquai hajan las magistras decis da far ina scunstrada ensemen. Lura vani a San Niclà, Chasura, Chaflur e Strada. Là datti lura gentar. E suenter vai vinavant a Martina. Per il ballin van ils uffants da Tschlin vi a Ramosch.
96 uffants sa participeschan al Chalandamarz Val Müstair
En la Val Müstair ha il Chalandamarz sa midà fitg ferm ils ultims onns. Quai ha da far cun la fusiun d'avant 15 onns. Pli baud aveva mintga vitg organisà sez in Chalandamarz ed oz datti in per l'entira val. Ils uffants da l'entira val van uschia dad ina fracziun a tschella. Radund dus terzs dals uffants cumenzan a Tschierv e tschels uffants si Lü e chantan e stgellan. Circa las 09:30 sa radunan tut ils uffants a Fuldera e lu vai ensemen fin a Müstair. En tut èn 96 uffants che sa participeschan al Chalandamarz. La saira ha lura lieu il ballin en sala da scola – in dals puncts culminants da la festa dal Chalandamarz.
A Samedan è in dals gronds Chalandamarz
Il Chalandamarz da Samedan è in dals gronds cun var 200 uffants. Cunquai ch'er la vischnanca è gronda èn las scolaras ed ils scolars da viadi en quatter gruppas, uschia ch'i dat chant en mintga quartier. Spezial vid il Chalandamarz da Samedan èn er ils costums appenzellais dals mats - la chamischa alva cun las vatgas ed il gillet cotschen e chautschas melnas. E las mattas portan il costum engiadinais da lavurdi. La sonda datti a Samedan il ballin suenter il Chalandamarz e là fan las scolaras e scolars ina polonaisa.
L'emprima fermada oz a La Punt Chamues-ch
Il Chalandamarz ha cumenzà la bun'ura las 06:00. Ils uffants pitschens e patruns èn gia stads da viadi la bun'ura las 03:00. Els ston chaminar blers kilometers per vegnir dad in piz da la vischnanca a l'auter. La vischnanca ha 700 abitantas ed abitants, dentant be 31 scolaras e scolars da la scolina fin la 6avla classa. Sco il commember da la cumissiun dal Chalandamarz Ralf Fluor ha ditg envers RTR sper'ins ch'i dat ils proxims onns cun las abitaziuns ch'ins fabrica puspè daplirs uffants. Tar las annadas fermas che vegnan uss pensiunadas eran quai anc stads fin a 70 uffants.
Plinavant avain nus tadlà sco ils uffants chantan e spezial è che mintga vischnanca ha sias atganas chanzuns. La suletta chanzun che tuts enconuschan è Chalandamarz – Chaland'avrigl.
A Zuoz hai gia cumenzà dals 28 als 29 da favrer
Il Chalandamarz ha cumenzà a Zuoz dals 28 als 29 da favrer a mesanotg amez il vitg. Ils patruns (pli vegls scolars) han schluppà lur giaischlas. Al medem mument èn ils «schefs dal Chalandamarz» – las patrunas e patruns – inscrits cun lur num en il «Vout» da la Chesa Planta. Entant ch'ils creschids han fatg festa da notg libra, han ils patruns stgellà tranter las 3 e las 5 la bun'ura avant la fanestra da mintga mat da scola per dar l'infurmaziun: «oz a las 6:45 sin Plaz! Fibla da la vart sanestra!» (Quai è l'indicaziun co ch'ins ha da purtar la stgella)
