Sper il nov lieu han ils organisaturs era spustà il termin dal il turnier, quel è in’emna pli tard. Quai per evitar collisiuns cun il campiunadi europeic che ha lieu quest onn a Göteborg en Svezia. Da duvrar il lieu oriund entamez San Murezzan Bogn er quest onn, n’ha la vischnanca betg pli lubì. Memia gronds sajan ils disturbis e las reclamaziuns, uschè ils arguments. Nov è il CSI San Murezzan da chasa sin il prà San Gian a l’ur da la vischnanca vers Champfèr.
Blers avantatgs
Sco quai ch’il responsabel per infrastructura dal CSI Fredy Wolf ha declerà, haja la midada dal lieu dal turnier internaziunal er ina pluna avantatgs. Surtut las dimensiuns che stattan a disposiziun sajan bler pli grondas, cumpareglià cun la plazza limitada dal prà da Polo.
Organisaziun è l’A e l’O
Da dar adatg hajan ins dentant da betg duvrar memia vehichels grevs sin l’areal, quel è numnadamain en ina zona da protecziun. Ultra da quai n’èn las pussaivladads per parcar betg propi idealas. Ils visitaders hajan da chaminar pli lunsch, admetta la presidenta dal comité d’organisaziun dal CSI, Leta Joos.
La fevra crescha
Curt avant l’emprim sigl dal turnier internaziunal a San Murezzan, saja il puls in toc pli aut tar tut ils passa 100 gidanters ch’èn vi d'installar tut l’infrastructura anc las ultimas minutas. Er Fredy Wolf ha da dar anc las ultimas instrucziuns per posiziunar tut las tendas e tavlas al dretg lieu.
312 chavals en stalla
Grond travasch datti er sin plazza fin ch’ils prezius giasts sin quatter chommas èn al lieu. En tut èn 312 chavals al turnier, cun en tut 133 chavaliers che sa participeschan als sigls en differentas categorias.
Ils megliers dal mund
Tut superbia è la Samedrina Leta Joos da la participaziun dals profis al turnier en Engiadina. Uschè èn quatter dals tschintg megliers chavaliers svizzers a la partenza a San Murezzan quest onn, e sa preparan en Engiadina gist per il campiunadi mundial a Göteborg l’emna proxima. Tranter auter per exempel Steve Guerdat e Martin Fuchs.
RR actualitad 17:00
