L’affar cun las cigarettas era in affar fitg lucrativ. Da la vart svizra era quai tuttafatg legal, tenor Fadri Cazin da Tschierv, e da la vart taliana eran quellas persunas avisadas sin ina entrada, da quella vart era la cuntrabanda baingea scumandada, ma ils chastis n'eran betg gronds.
La cuntrabanda en Val Müstair ha funcziunà radund 10 onns, dals onns 1961 fin 1972 era quai ina lavur lucrativa. Sin las cigarettas avevan ins da pajar ina taglia sin il tubac. Calculaziuns mussan ch'ins ha pajà durant quels radund 10 onns a l'AVS, Assicuranza per vegls e survivents, radund 15 milliuns francs mo or da la cuntrabanda en Val Müstair.
Il bab da Fadri Cazin aveva in deposit per las cigarettas suenter ch’ellas arrivavan cun la Viafier retica fin a Zernez e lura cun camiuns sur il Pass dal Fuorn en Val Müstair. La cuntrabanda funcziunava da stad e d’enviern. Fadri Cazin sa regorda bain da quel temp, pajà vegniva contant e senza quittanzas, la fiduzia tranter ils Svizzers e Talians era gronda.
Oravant tut il viadi d’enviern sur il pass da l'Umbrail era per part spectacular. Cun jeeps militars senza tetg vegniva transportà fin ch'igl era pussaivel causa las circumstanzas da la via, da là enavant vegniva perfin transportà cun l'helicopter fin sin l'ospizi.
Da primavaira lura vegnivan ils Talians cun camiuns sin l'ospizi per las cigarettas e manavan elas giu la val per vender. Causa la svalitaziun da la lira ed er causa l’adattaziun dal pretsch da cigarettas en Svizra ha la cuntrabanda funcziunà mo fin l’onn 1972, suenter n’era quai betg pli lucrativ.