Frontaliers talians ston far viadis enorms

La via tras la Bregaglia è serrada pervia da las bovas a Bondo. Perquai ston ils cunfinaris da la provinza da Sondrio far viadis da lavur enorms per arrivar en l'Engiadina.

Valter Mengolli e Gian Rudolf Caprez Bild in Lightbox öffnen.

Legenda da maletgs: Valter Mengolli e Gian Rudolf Caprez sin in plazzal a Zuoz. RTR/David Spinnler

Valter Mengolli e Gian Rudolf Caprez Avrir maletg en lightbox.

Legenda da maletgs: Il cunfinari Valter Mengolli (san) e Gian Rudolf Caprez sin in plazzal a Zuoz RTR/David Spinnler

La via tras la Bregaglia è serrada tranter Spino e Promontogno - pervia da las bovas ord la Val Bondasca. In problem per ils passa 1000 cunfinaris che arrivan mintga di ord la provinza taliana Sondrio a la lavur en Svizra. La lingia tras la Bregaglia en l'Engiadina è la colliaziun directa. Ussa ston ils cunfinaris far grondas sviadas. Ubain da Chiavenna sur il pass dal Spleia, lura a Tusaun, vinavant vers Savognin e finalmain sur il pass dal Güglia enfin en l'Engiadina. U lura tras la Vuclina e lura tras il Puschlav e sur il pass dal Bernina. Quai èn viadis da dus enfin trais uras empè da mo ina ura.

Ils patruns fan quitads

Per ils patruns dals cunfinaris n`è la situaziun er betg simpla: els èn dependents dals collavuraturs. Quels ston perquai vegnir tut normal a la lavur. Quai dian tant firmas da construcziun sco era per exempel las pendicularas da l'Engiadin'Ota. Senza collavuraturs na possian ins betg prestar las lavurs ch'ins stoppia. Il pli grond quità dals patruns è dentant la pussaivladad che i pudess dar anc a pli lunga vista problems da colliaziun da traffic tras la Bregaglia. Sche la via restass serrada o bloccada adina puspè pervia da bovas, savess quai era daventar in grond problem per il turissem da l'Engiadin'Ota. Ils turists che arrivan da l'Italia dovran numnadamain era la colliaziun tras la Bregaglia.

RR actualitad 17:00