Siglir tar il cuntegn

Header

cuntegn

Engiadina Il schoc ha fatg effect

L’annunzia da serrar l’Institut Otalpin a Ftan è stà in schoc per l’entira regiun da l’Engiadina Bassa. Quest schoc ha dentant betg mo paralisà, mabain era deliberà novas forzas. In comité è sa furmà ed ha cumenzà a curta vista in’acziun per rimnar suttascripziuns e daners – cun success surprendent.

Il comité ed ils geniturs han scrit brevs a diversas instituziuns e fundaziuns. Tschients suttascripziuns èn vegnidas ensemen ed era ils daners necessaris. Quasi sco tar in’acziun da la chadaina da fortuna è sa mussà la solidaritad. Ina da las fundaziuns dumandadas, la fundaziun Ueli Schlageter da Turitg ha empermess 500'000 francs.

audio
Saira: La fundaziun Ueli Schlageter da Turitg – Ina da pliras
ord Actualitad dals 30.07.2015.
laschar ir. Durada: 2 minutas 15 Secundas.

I dat anc dapli sustegn

Ed era il Padrinadi svizzer per vischnancas da muntogna ed ulteriuras fundaziuns sajan prontas da dar daners, sche la politica surpiglia la responsabladad e sch'i dettia concepts cun pes e mauns, ha ditg Barbla Conrad dal comité che s'engascha per l'institut ad RTR.

«Blers daners èn vegnids ensemen e quests tanschan gia per segirar la cuntinuaziun da l’institut», di Barbla Conrad. «E bleras instituziuns n’han anc gnanc betg tractà la dumonda.»

Suenter che nus avain contactà tut ils geniturs e dumandà per sustegn finanzial, è quai sa derasà sco ina lavina.
Autur: Barbla Conrad comité che s'engascha per l'institu

Ussa dependi da las annunzias dals scolars

Suenter ch'els hajan contactà tut ils geniturs e dumandà per sustegn finanzial, saja quai sa derasà sco ina lavina. Tscherts geniturs hajan inditgà adressas da fundaziuns ed instituziuns ed era anteriurs scolars da l'Institut Otalpin èn vegnids contactads. Uschia sajan vegnids ensemen ils daners necessaris.

«Ussa dependi sulet anc da las annunzias dals scolars», manegia Barbla Conrad. Almain 50 scolaras e scolars stuessan s'annunziar per garantir che l'institut po cumenzar l'onn da scola nov.

Artitgels legids il pli savens