In lai da far bogn a Ftan – l’idea vegn adina pli concreta

Dals onns 1930 enfin dal 1980 existiva in lai per nudar en vischinanza dal Institut Otalpin a Ftan. La Pro Ftan ha preschentà a la populaziun il project per reviver il lai.

la visualisaziun dal project previs, per realisar il lai a Ftan. Bild in Lightbox öffnen.

Legenda da maletgs: Il project previs per realisar il lai da far bogn a Ftan. RTR, Georg Luzzi

In mir da fermada ed ina passarella da crap èn ils unics relicts visibels. Aua na datti gia dapi 35 onns betg pli en la foppa nua ch'il lai da bogn era ina giada.

Il lai era il pool da las scolaras da l'institut

A partir dals onns 1930 era il lai en possess dal Institut Otalpin a Ftan. Là emprendevan las giuvnas studentas a nudar. Quai era ina part da las lecziuns da scola.

La societad Pro Ftan vul ussa reactivar questa tradiziun. Il lai dess daventar in lieu per indigens e giasts, dimena in'attracziun turistica per tut la regiun. Cun «Crowdfunding» vulan els ramassar ils raps. Il project vegn a custar 360’000 francs, in terz paja la Pro Ftan, in auter terz la vischnanca da Scuol e l’ultim terz duai vegnir finanzià cun agid da «fans» e «Crowdfunding».

Sairada d'infurmaziun per giast ed indigen

Dacurt ha la Pro Ftan ensemen cun l'architect e planisader preschentà il project per realisar quest’attracziun. Radund 70 persunas, oravant tut giasts, han perndì part a la preschentaziun. Quasi tut ils preschents èn persvas che quest’idea maina a Ftan ed era a la regiun ina impurtanta purschida turistica.

RR actualitad 07:00