Siglir tar il cuntegn

Header

cuntegn

Engiadina In num nov - las Pendicularas Scuol SA

Las pendicularas Scuol han midà lur num da «Pendicularas Motta Naluns Scuol-Ftan-Sent SA» en «Pendicularas Scuol SA». Plinavant vegnan las aczias midadas dad aczias al purtader en aczias nominalas.

Ils responsabels da las pendicularas han preschentà in rendaquint egualisà cun in cashflow da 3.5 milliuns francs. Ina da las sfidas da l’on passà era la fabrica da la sutgera per sis persunas da Prui a Clünas, scriva l’agentura da novitads rumantscha ANR.

Malgrà che l’indriz da transport era pront a temp han las pendicularas dà liber l’implant pir en decurs dal schaner. Il motiv per il retard, uschia l’ANR vinavant, sajan stadas las temperaturas chaudas e la mancanza da naiv.

Midament da las aczias ad aczias nominalas

Il punct impurtant dal midament dals statuts è il midament da las aczias - dad aczias al purtader en aczias nominalas.

Quai ha per consequenza che la vendita dad aczias sto vegnir approvada dal cussegl administrativ. Quest punct ha procurà a la radunanza per ina discussiun. Ma a la fin è la midada vegnida approvada da la gronda maioritad.

Cussegl administrativ mo anc cun 7 commembers

In ulteriur punct che ha procurà per discussiun è stà il midament dal dumber dals commembers dal cussegl administrativ da 12 sin 7. Betg il dumber sez è vegnì mess en dumonda, mabain il fatg che dus commembers da la vischnanca da Scuol ed in da la vischnanca da vischins da Scuol èn fixs.

Differentas persunas eran da l’avis ch'i fiss meglier d'integrar er las vischnancas da la regiun. La fin è vegnida approvada la proposta dal cussegl administrativ culs represchentants da la vischnanca da Scuol.

Artitgels legids il pli savens