Siglir tar il cuntegn

Header

cuntegn

Engiadina Investider potenzial per la Lagalb vul sustegn

Ussa èsi ora, tgi che s'interessescha d'investir en las pendicularas sin il Pass dal Bernina. «Engadin St. Moritz Mountains» conferma discurs intensivs cun Gian Luzi Battaglia. L'interprendider ha entant era gia contactà las vischnancas da Puntraschigna e Poschiavo per dumandar in eventual sustegn.

L’interprendider puschlavin Gian Luzi Battaglia saja in dils investiders interessads che duess salvar l’implant da skis da la Lagalb.

1 milliun francs l’onn

Sco quai ch’il president da la societad, Luis Wieser ha ditg ad RTR fiss la «Engadin St. Moritz Mountains SA» pronta da porscher maun a reguard la gestiun tecnica da la Lagalb. Da far quint hajan ins cun investiziuns da var 1 milliun francs per onn. Quai per garantir ina cuntinuaziun da l’andament.

Proxim inscunter in schaner

Tenor il president communal da Poschiavo, Alessandro della Vedova, haja l’interprendider Gian Luzi Battaglia era gia contactà las duos vischnancas territorialas da l’implant da skis per dumandar quant grond che l’interess saja per mantegnair la purschida da la Lagalb. Tant Poschiavo sco er Puntraschigna na vulan anc betg pigliar posiziun avant che l’investider ha preschentà in plan da business a las suprastanzas. Cumenzament da schaner 2016 duessi dar in proxim inscunter tranter Gian Luzi Battaglia e las vischnancas da Puntraschigna e Poschiavo.

audio
Investur Lagalb intervista Luis Wieser
ord Actualitad dals 17.12.2015.
laschar ir. Durada: 3 minutas 10 Secundas.

I va per il surviver

Per la Lagalb sa tracti d’ina cursa cunter il temp. Sch’ins na chattia betg in investider pront da finanziar en l'avegnir la gestiun da la Lagalb, è la stagiun d’enviern 2015/16 la davosa per l’implant da las pendicularas Engiadina San Murezzan Mountains.

RR novitads 17:00

Artitgels legids il pli savens