Vers venderdi saira vegn mess en funcziun la punt provisorica da l'armada a S-charl. Pervi da las bovas che han devastà la via e la punt è l'uclaun da la vischnanca da Scuol stà cuntanschibel durant in'emna sulet a pe.
Tenor Jon Carl Stecher, il schef da l'uffizi da construcziun da Scuol, haja la construcziun da la punt d'urgenza funcziunà tenor plan. L'armada metta a disposiziun la punt gratuitamain per in mez onn fin ch'ina punt civila è construida.
Anc mai ha l’armada svizra installà ina tala punt en in cas d’urgenza per diever civil. Grazia a questa premiera n‘è S-charl ussa betg pli separà dal rest da mund.
19 schuldads da l’armada svizra han lavurà sin il plazzal da la punt provisorica en la Val S-charl. A partir da damaun venderdi duain uschia var 80 persunas pudair bandunar la Val S-charl sin via. La punt provisorica cun ina lunghezza da 46 meters po purtar paisas fin ad 80 tonnas.
1 / 5
Legenda:
Las lavurs per la punt provisorica en la Val S-charl han cumenzà.
RTR, O. Seiler
2 / 5
Legenda:
In element da la punt provisorica per pussibilitar l’access en la Val S-charl.
RTR, O. Seiler
3 / 5
Legenda:
La punt provisorica è pronta per vegnir plazzada.
ANR, Rest Giacun Dermont
4 / 5
Legenda:
Vista da surengiu sin il plazzal per la punt provisorica.
RTR, O. Seiler
5 / 5
Legenda:
Il territori instabil sur la via en la Val S-charl, cun la punt provisorica.
RTR, O. Seiler
audio
Saira: La punt provisorica per la Val S-charl è en construcziun
