Siglir tar il cuntegn

Header

cuntegn

Engiadina Lavurs a Punt dal Gall sa retardeschan

Sco quai che Michael Roth, il directur da las ovras electricas d'Engiadina Bassa, ha confermà a Radiotelevisiun Svizra Rumantscha sa retardeschan las lavurs vi dal mir da serra Punt dal Gall. La raschun sajan sediments al fund dal mir che impedeschian da montar il viertgel avant la svidera da fund.

Il viertgel sto vegnir montà per cuntinuar cun las lavurs al sitg vi dal mir da serra.

Il problem è ch'i n'è betg reussì da pumpar davent ils sediments, perquai che ina part dal material è dira. I dovra ina crana speziala per trair or dal lai material. Quel vegn ad esser enturn ils 20 avust sin plazza.

300 fin 500 meters cubics material ston davent

I sa tracta tenor Michael Roth en tut da radund 300 fin 500 meters cubics material. La gronda part da quai è vegnì en il lai cun la bova ch'igl ha da la fin da zercladur da quest onn. Problems fa quella part ch'è dira e na po betg vegnir tschitschada davent.

En ina emprima fasa èsi tenor Michael Roth gartegià da montar 1 viertgel ed els han pudì entschaiver cun las lavurs da mantegniment vi dal mir. Il segund, numnadamain quel da la svidera da fund, po dentant pir vegnir montà, cura che ils sediments èn davent.

Retard da radund 2 mais e custs supplementars

Michael Roth speria da pudair terminar las lavurs per la fin da quest onn. La davosa giada duain ils sfundaders ir il november a funs dal lai per puspè demontar ils viertgels. Ils custs supplementars vegnan il mument eruids. I vegn ad esser radund 10% dal total da 24.5 milliuns francs.

RR novitads 12:00

Artitgels legids il pli savens