La mancanza d’emprendists ed emprendistas resenta era la branscha automobila en Engiadina. Enfin uss han las passa 40 garaschas en la regiun occupà be quatter plazzas da giarsunadi per l’avust che vegn. Per cumbatter la mancanza, s'èn messas ensemen differentas garaschas indigenas ed han organisà per l’emprima giada in’exposiziun da mastergn sin l’areal da la plazza aviatica a Samedan.
Sentir la lavur in ad in
L’exposiziun a Samedan na dat betg be in’envista teoretica en ils differents mastergns automobils, mabain han las visitadras ed ils visitaders era la pussaivladad dad empruvar ora la lavur pratica. Dar grass, midar pneus, vernischar, tut quai ch’ins fa sch’ins emprenda in mastergn en la branscha. Tenor Slava Damjanovic, co-organisatur da l'eveniment saja impurtant da pudair mussar la lavur uschè real sco pussaivel. Quai duai numnadamain motivar giuvnas e giuvens da s’annunziar per in giarsunadi d’emprova u schizunt in giarsunadi. Cun l’exposiziun prova la branscha automobila pia activamain da cumbatter la mancanza d’emprendistas ed emprendists.
