La radunanza communala ha fatg bun cun gronda maioritad la missiva correspondenta per mauns da la votaziun a l'urna da l'onn proxim. Ils 7 suprastants communals na duain uschia betg pli vegnir elegids suenter ina clav da scumpart da las singulas fracziuns. L'entira Val Müstair duai eleger en avegnir 7 persunas che abiteschan en Val Müstair, betg dependent da la fracziun nua ch'els abitan. Ils circuls electorals da las fracziuns duain vegnir abolids. Nov vegn era ad esser ch'il president communal vegn elegì avant la suprastanza communala. Il gea a questa midada da la radunanza communala è stà fitg cler. Ussa sto la populaziun decider definitivamain questa midada a l'urna, quai il favrer u mars 2016.
Gea ad ina halla da zinslas ed ad ina nova tschiffada d'aua en Val Vau
La radunanza communala ha en pli deliberà il preventiv 2016 da la vischnanca che prevesa in gudogn da passa 600'000 francs. La Val Müstair quinta cun radund 14 miliuns entradas e sortidas da passa 13.3 miliuns francs. Las sortidas èn uschia per radund 900'000 francs pli bassas che per l'onn 2015. Gea ha ditg la populaziun era ad in credit da 650'000 francs per ina nova halla da zinslas ed ad in credit dad 1.6 miliuns francs per ina nova tschiffada d'aua per il provediment electric en Val Vau.