Siglir tar il cuntegn

Header

video
SRG.R a La Punt Chamues-ch
Or da Actualitad dals 17.06.2017.
laschar ir. Durada: 2 minutas 49 Secundas.
cuntegn

Engiadina Onurificaziun e plans per in avegnir segirà

In’onurificaziun per ils Dis da litteratura a Domat ed infurmaziuns detagliadas davart las sfidas futuras da la societad purtadra dad RTR, la SRG.R, èn stads ils puncts principals da la radunanza generala a La Punt Chamues-ch.

Per l’emprima giada ha la SRG.R surdà in premi ad in’organisaziun e betg sco ils davos onns ad ina persuna singula. Il president da la societad, Oscar Knapp, ha surdà in crap simbolic a las trais organisaturas dals Dis da litteratura ch’eran preschentas a La Punt Chamues-ch.

Bella surpresa

Per la suprastanza dals Dis da litteratura a Domat saja il premi da la SRG.R. ina gronda surpraisa ed ina renconuschientscha bainvesida per lur lavur, ha declerà Sara Francesca Hermann dal comité d’organisaziun. Nua ch’ins vul investir il premi dad 8’000 francs, na saja betg anc enconuschent. Ils proxims Dis da litteratura a Domat ils 3 fin 5 da november 2017 vegnan a star sut il titel «gieus», ha tradì Sara Francesca Hermann.

Ladina Heimgartner
Legenda: La directura dad RTR Ladina Heimgartner ha infurmà davart las activitads da Radiotelevisiun Svizra Rumantscha. RTR, Stefan Dobler
audio
Sco in 6er en il lotto per ils Dis da litteratura
ord Novitads dals 17.06.2017.
laschar ir. Durada: 2 minutas 51 Secundas.

Mobilisar ed infurmar

Sper l’approvaziun dal rendaquint da la societad, han ils 74 preschents er udì dapli davart las activitads da l’onn passà da Radiotelevisiun Svizra Rumantscha tras la directura Ladina Heimgartner.

Ultra da quai ha il president da la SRG.R infurmà co ch’ins vul agir en connex cun l’«iniziativa No Billag«. Il pli impurtant saja d'infurmar la glieud uschè bain sco pussaivel, uschia Oscar Knapp. Quai per che mintgin sappia er tge ch’i vegnia prestà tut dad RTR e da l’entira SRG cun ses differents secturs.

La proxima radunanza generala da la SRG.R ha lieu a Landquart ils 26 da matg 2018.

Artitgels legids il pli savens