Siglir tar il cuntegn

Header

cuntegn

Engiadina Perfuraziun dal tunnel dal sviament da Silvaplauna

Dapi l'emprima siglientada per il tunnel da Silvaplauna avant in onn e mez arriva ussa l'exchavaziun per il tunnel da 750 meters lunghezza a sia fasa finala. Cun la perfuraziun dal glindesdi vegnia cuntanschì in term impurtant dal sviament da Silvaplauna, scriva il chantun.

Il project «sviament da Silvaplauna» saja sin buna via per l'avertura probabla l'atun 2018. Quai scriva il l'Uffizi da construcziun, traffic e selvicultura dal Grischun. Da l'avanzament che descenda e da l'emprima exchavaziun Pignia sajan resultads dapi la primavaira 2015 circa 95'000 m3 material.

Survista dal sviament da Silvaplauna.
Legenda: Survista dal sviament da Silvaplauna. Uffizi da construcziun, traffic e selvicultura dal Grischun

A chaschun da la perfuraziun dals 29 d’avust vegnian ussa exchavads ils ultims meters grip che mancan anc per il tunnel extraordinari cun ina pendenza dad 8,5%. Uschia resulta per l'emprima giada in passadi tranter las duas varts dal tunnel. Grazia a la pendenza dal tunnel, na vegn quel era betg ad avair ina ventilaziun. Dentant funcziuneschia pervi da la differenza d'autezza l'effect da chamin, ha declerà in inschigner sin il plazzal da fabrica.

Construcziuns internas mancan anc

Fin a l'avertura da sviament da Silvaplauna che cumpiglia circa 1’470 meters e ch’importia custs totals da ca. 70 milliuns francs saja anc necessari da far vastas lavurs, uschia l'uffizi.

audio
Proxim pass impurtant per sviament Silvaplauna
ord Novitads dals 29.08.2016.
laschar ir. Durada: 3 minutas 12 Secundas.

Particularmain saja da terminar las construcziuns internas e l'equipament da gestiun e da segirezza dal tunnel, la galaria da segirezza ed il tunnel construì sut tschiel avert sco er las centralas dal tunnel ed ils trassés che mancan anc.

RR novitads 11:00

Artitgels legids il pli savens