Il plan da render pli attractiv la vischnanca da Schlarigna va en in'ulteriura fasa. La radunanza communala da Schlarigna ha incumbensà la suprastanza communala, en ina votaziun consultativa, da prender per mauns il project parzial 2 dal project «La Diagonela». Quai scriva la vischnanca.
La suprastanza duai tschertgar in investur adattà ed elavurar cun quel in project pli detaglià, cumprendì ina proposta da credit. Il project parzial preveda tranter auter:
- chasa da parcar sutterrana cun duas auzadas e 277 parcadis
- center da passlung a l'entrada da la chasa da parcar
- quatter edifizis cun stizuns ed abitaziuns sin la parcella «Punt Schlattain»
- nov magasin da pumpiers a Grevas
Il project parzial 1, che cumpiglia vias ed ina cuntrada da parc, vegn spustà sin pli tard.
Per realisar il project sto era la planisaziun locala vegnir adattada. La populaziun po far propostas e protests davart la revisiun da la planisaziun locala fin ils 11 da december.
