Siglir tar il cuntegn

Header

cuntegn

Engiadina San Murezzan: Nagina soluziun tranter bogn da cura e Bäder SA

Il bogn da cura a San Murezzan – la MTZ Heilbad SA – va avant dretgira cun la St. Moritz Bäder SA. Quella aveva visà il contract da locaziun. Per chattar ina schliaziun aveva la vischnanca da San Murezzan intermedià, dentant senza success.

Tranter il bogn da cura (MTZ Heilbad AG) e la St. Moritz Bäder SA na datti nagina schliaziun extragiudiziala en la dispita pervia dal contract da locaziun. La Bäder SA aveva desditg il contract da locaziun sin la fin da matg 2017, la fin da la durada ordinaria dal contract. Il MTZ vul però restar e sa dosta.

La vischnanca da San Murezzan aveva surpiglià il schaner da quest onn da manar las discussiuns tranter las duas partidas, dentant senza success. La desditga dal contract da locaziun duaja perquai vegnir examinada avant dretgira, ha communitgà il bogn da cura. Quai suenter ch’il locatur Bäder SA haja fatg en differentas tractativas consentiments e pli tard betg sa tegnì londervi.

Existenza periclitada

Sco la MTZ Heilbad AG scriva, veglia ella cun ir avant dretgira cuntanscher che la desditga dal contract vegnia annullada. Uschiglio saja il bogn da cura periclità en sia existenza. Il manaschi che renda, occupa actualmain 30 collavuraturs. Sper il bogn curativ porscha il manaschi fisioterapia ed era tractaments medicinals e cosmetics.

Nagina prontadad da tractar

La Bäder SA percunter ha ditg envers Radiotelevisiun Svizra Rumantscha RTR ch'ins haja fatg ina nova proposta da contract al bogn da cura MTZ. La MTZ n'haja dentant gnanc respundì sin quella proposta. La proposta avess prevì tenor il manader da la Bäder SA Raimund Kirchleitner in nov contract per 15 onns. Durant 5 onns fiss il tschains da locaziun restà sco oz, ils proxims 10 onns avess il MTZ stuì pajar radund 270. - francs per meter quadrat ad onn. Quai saja il tschains en media da tut ils locaturs en chasa di Kirchleitner. Actualmain paja il MTZ 145. - francs per meter quadrat. Quel fit na saja betg conform al pretsch da martgà.

RR novitads 16:00

Artitgels legids il pli savens