Siglir tar il cuntegn

Header

cuntegn

Engiadina Sara-Bigna Janett, ina giuvna solista tar l'operetta Haldenstein

Sara-Bigna Janett ha 25 onns ed è oriunda da Madulain. Per la giuvna che ha studegià chant ad Innsbruck e Vienna, e terminescha uss il studi a Turitg, è la rolla en l'operetta «Die Fledermaus» da Johann Strauss, dada sin il chastè da Haldenstein, in dals pli gronds projects en sia carriera fin ussa.

Per Sara-Bigna Janett eri dapi ina visita en l'opera da Turitg en la vegliadetgna da 6 onns cler, ch'ella veglia daventar chantadura d'opera. In avantatg è stà che ses bab Jachen Janett, ch'è in enconuschent musicist e dirigent da l'Engiadina, ha sustegnì sia feglia. Ma il mund d'operas n'è tuttavia betg uschè glamurus e bels sco quai che Sara-Bigna Janett aveva s'imaginà el da lezzas uras sco buoba en l'opera da Turitg.

Betg uschè simpel

"Igl è blera lavur, igl è bleras giadas ch'ins na survegn betg lavur e bleras giadas ch'ins dubitescha sa sez...". Sco chantadura giuvna sto Sara-Bigna Janett adina puspè chantar avant e sa participar a concurrenzas, e magari er lavurar sco camariera per gudagnar insatge tiers. Er tar l'operetta da Haldenstein n'avess Janett betg quintà ch'ella survegnia la rolla. Uss dentant è ella fitg cuntenta, tant cun il chant sco cun il caracter.

audio
Bunura: Sara-Bigna Janett ha ina da las rollas principalas en l’operetta «Die Fledermaus» da Johann Strauss
ord Actualitad dals 30.07.2015.
laschar ir. Durada: 6 minutas 12 Secundas.

Ina rolla sumeglianta a la realitad

Janett gioga ina fantschella che vul per vita e mort far carriera sco actura. Ma quai era grev da lezs temps (enturn 1850), cunzunt sco fantschella. Ina rolla cun tschertas parallelas tar la vaira Sara-Bigna Janett, che vul er far carriera sco chantadura d'opera ch'è era in zic actura. Fin uss fa ella quai cun success, er sch'i na tanscha betg anc da viver mo da la musica.

Artitgels legids il pli savens