Siglir tar il cuntegn

Header

cuntegn

Engiadina Val Müstair ha dus ulteriurs novs suprastants communals

Hansjörg Weber e Cla Filip Pitsch èn elegids en il segund scrutini, ils suprastants en uffizi Gian Tschenett ed Aldo Pitsch n'èn betg reelegids.

La suprastanza communala da la Val Müstair è cumpletta: En il segund scrutini ha la populaziun elegì cleramain Hansjörg Weber (398 vuschs) e Cla Filip Pitsch (349 vuschs).

Uschia èn sper il president nov Rico Lamprecht era trais commembers da la suprastanza communala nov en suprastanza. Roman Federspiel era gia vegnì elegì en il prim scrutini ils 6 da november, ussa èn era Hansjörg Weber e Cla Filip Pitsch elegids. Sper els èn vegnids elegids en il prim scrutin ils suprastants en uffizi Gian Duri Conrad, Aldo Rodigari e Gabriella Binkert.

Aldo Pitsch e Gian Tschenett betg reelegids

Ils suprastants en uffizi Aldo Pitsch e Gian Tschenett n'èn dentant betg pli vegnids reelegids. Els eran gia en il prim scrutini sin las plazzas suenter Hansjörg Weber e Cla Filip Pitsch. Gian Tschenett ha cuntanschì la terza plazza en il segund scrutin cun 47 vuschs retard sin Cla Filip Pitsch. Aldo Pitsch percunter n'ha gì nagina schanza ed ha fatg 105 vuschs damain che Cla Filip Pitsch.

La participaziun da vuschs è puspè stada fitg auta cun 66%.

La nova suprastanza communala:

  • Rico Lamprecht (president communal)
  • Gabriella Binkert Bechetti
  • Gian Duri Conrad
  • Roman Federspiel
  • Aldo Rodigari
  • Cla Filip Pitsch
  • Hansjörg Weber

RR novitads 12:00

Artitgels legids il pli savens