Previs è che las vischnancas pajan l’onn 2017 radund 1,4 milliuns francs a l’ospital regiunal a Samedan. Quai èn 0,2 milliuns damain che budgetà. Co Heinz Schneider, il directur da l’ospital Samedan ha declerà al parlament, sajan ins vinavant sin buna via per reducir ils custs per las vischnancas.
Investiziun en cuschina
Cun in’investiziun da dus milliuns francs vul l’ospital regiunal modernisar e renovar la cuschina existenta ch'è entant 37 onns veglia. Ultra da quai surpiglia l’ospital a partir da december 2016 la partiziun da la pratica da pediatria da dr. Bienentreu a San Murezzan.
Bunas notas da pazients
Cun in questiunari ha l’ospital dumandà ses pazients quant cuntents ch'els sajan cun ils servetschs purschids. En general resulta che l’ospital s'ha pudì megliurar en tut las partiziuns dapi l’ultima retschertga l’onn 2012. Surtut la tgira saja vegnida valitada fitg auta, ha suttastritgà il directur.