Tenor infurmaziuns da Claudio Duschletta, il chanzlist da Zuoz, veglia er l’interpraisa da telecommunicaziun porscher gia il proxim onn ina rait cun fibra da vaider en l’Engiadina. La Swisscom saja s’annunziada be curt suenter ch’ils discurs cun Mia Engiadina sajan vegnids enconuschents.
audio
Bunura: Zuoz – proxim pass per fibra da vaider
ord Actualitad dals 12.10.2016.
laschar ir. Durada: 3 minutas 11 Secundas.
Lingias sveltas e WLAN en vischnanca
Il cussegl communal da Zuoz ha entant prendì enconuschientscha davart il resultat da l’evaluaziun da bischens vids en vischnanca. Per quella aveva la vischnanca deliberà 50’000 francs per l’interpresa Mia Engiadina. Avant maun sajan gia en la gronda part da Zuoz bischens vids ch’ins pudess duvrar per trair en ils fils. La finamira saja da porscher ina rait svelta ed ina colliaziun da WLAN en vischnanca.
Elavurar detagls e spetgar offertas
Durant ils proxims mais veglian Mia Engiadina e la Repower elavurar tut ils detagls per realisar il project. Da far quint saja dentant ch’era la concurrenza na dormia betg durant l’enviern. Cun quai vegnia ins ad avair la primavaira las offertas dad omadus interessents sin maisa. En quest cas vegnia il pretsch ad esser decisiv, ha ditg Duschletta vinavant.
RR actualitad 07:00