Differentas butias duaian dastgar vender pli ditg lur products – er sche la data da conservabladad è gia scrudada. Quai è l'idea dal project «Food-save» ch'il chantun Grischun ha decis da sustegnair. El sa participeschia als custs per ils sets da start che custan 200 francs. Quests setg pussibiliteschan da giuditgar e marcar victualias che pon vegnir vendidas suenter la data da conservabladad. Quai scriva l'Uffizi chantunal per natira ed ambient.
En tut la Svizra possian butias pitschnas e mez grondas uschia salvar 20'000 fin 30'000 tonnas nutriment ch'ellas stuessan uschiglio bittar davent. Las butias na pon grazia al project betg mo reducir il sfarlattim da vivondas ch'ha effects donnegius sin l'ambient, mabain era spargnar daners.
Blers products sajan anc buns e segirs per consumar in temp sur la data da conservabladad – tar la farina per exempel fin 360 dis. Quai na sappian persunas privatas savens betg: Radund 20% dal foodwaste en chasas privatas vegn chaschunà perquai ch'ils consuments e las consumentas interpreteschian fallà questa data. Pli impurtant che la data saja co che la vivonda guardia or, tge odur ch'ella haja e co ch'ella gustia.
La gronda part da tut il sfarlattim da vivondas en Svizra – fin 60% en l'onn 2022 – vegn chaschunada da chasas privatas. Quai ha in studi davart foodwaste or dals Stadis Unids mussà. Qua perquai intgins tips e trics or da l'archiv davart il tema:
