Siglir tar il cuntegn

Header

cuntegn

Grischun Central Activist e giurist grischun Andrea Bianchi è mort

L'enconuschent activist e giurist grischun Andrea Bianchi è mort. Quai ha la polizia chantunala confermà.

Bianchi è sa disgrazià tar in'aventura da raiver a Campsut en Val Avras. In indigen aveva chattà el la dumengia mort en la suga da raiver. La polizia è vi da sclerir la raschun da la mort.

Deputà en il Cussegl grond

Andrea Bianchi aveva 62 onns ed abitava a Malix. Durant sia vita è il giurist er stà activ en la politica: Tranter auter sco cusseglier communal da Cuira (1981-1988) e sco deputà dal Cussegl grond ils onns 1991 fin 1994.

Activ fin la fin

Andrea Bianchi è stà tranter auter er derschader accessoric da la dretgira districtuala Plessur (2001-2010) u commember da la suprastanza da la GEVAG, la Corporaziun da vischnancas per l'allontanament da rument en il Grischun, ils onns 1997 fin 2008.

Engaschà ed activ è Andrea Bianchi adina stà durant sia vita: uschia era el dapi il 2006 tranter auter er commember dal cussegl da fundaziun da «Bergwaldprojekt» u vicepresident da Mountain Wilderness International dapi il 2010. E dapi il 2011 era Andrea Bianchi l'intermediatur e parsura da l’autoritad da mediaziun per relaziuns da locaziun.

RR novitads 18:00

Artitgels legids il pli savens