Robert Brunold è vegnì reelegì per ils ulteriurs trais onns sco president da l’uniun grischuna da chatschaders da patenta. Nov en suprastanza centrala fan part Tarzisius Caviezel da la secziun Tavau ed Arnold Giger da la secziun Greina.
Ils ulteriurs commembers èn vegnids reelegids a la 103avla radunanza da delegads a Cazas en l’Arena Grischuna. Plinvant è vegnì definì, cura che la chatsch‘auta 2018 ha lieu. Quella cuzza dals 1 fin 9 da settember e dals 19 fin 30 da settember. En tut cumpiglia la segunda varianta ch’è vegnida elegida otg dis da chatscha durant las fins d’emna, tge che vegnia encunter a chaschadras ed a chatschaders che na possian betg prender liber durant l’emna, ha fatg valair la suprastanza.
Approvà duas propostas
Omaduas propostas ch’èn vegnidas inoltradas èn vegnidas approvadas. Uschia èsi en l’avegnir pussaivel per chatschaders da capricorns, dad ir sin la chatscha supplementara era sch’els n’èn betg sa participads a la chatsch‘auta.
La secziun Purtenza ha argumentà, che las pretensiuns per la chatscha da capricorns sajan s’augmentadas ils davos onns. I na saja betg fair, che chatschaders che sa preparian bain sin la chatscha da capricorns vegnian punids cun betg pudair ir sin la chatscha supplementara senza ir sin la chatsch’auta.
Pli baud en l'acla
La secziun Alpina Roveredo ha pretendì ina midada en las prescripziuns dal diever da la chatscha. Da nov duessi il di avant che la chatscha cumenza ed il di da Rogaziun federala esser pussaivel a chatschaders, d'ir en lur acla gia a partir da las 12:00 empè pir davent da las 16:00. Questa midada duai gidar a quels chatschaders, che ston ir en in’acla ch’è lunsch davent da la vischnanca.
En il Mesauc dettia chatschaders che arrivan il mument pir suenter las otg la saira en lur acla. Quai na saja betg bun perquai che la selvaschina vegnia disturbada durant il pascular, tge che muntia damain cletg il di cura che la chatscha cumenza. Omaduas propostas ston anc vegnir approvadas da la regenza.
Tribunal federal decida
Sco quai ch’il cusseglier guvernativ Mario Cavigelli ha ditg, quinta el proximamain cun ina decisiun dal Tribunal federal che tracta l’iniziativa chantunala che vul scumandar la chatscha supplementara. La Dretgira administrativa aveva declerà nunvalaivla l’iniziativa, medemamain sco era il Cussegl grond.
Il luf dat da discutar
En in pled ha il cusseglier dals chantuns Stefan Engler ditg, ch’ina intervenziun minimala stoppia esser pussaivla quai che pertutgia il luf. Era Mario Cavigelli ha ditg, che la populaziun dal luf stoppia – sch’i fetschia da basegn – vegnir controllada. Gia in dumber da 20 lufs saja problematic.
RR novitads 20:00
