Preschent a Rona è stà sper 9'000 visitaders er in’equipa mobila da la duana: Sco quai che Martin Tschirren, il pledader dal corp da guardias da cunfin regiun trais ha ditg, haja dà pliras controllas sin l’areal da la festa da Goa a Rona. Ins haja controllà ils vendiders dals stans da l’exteriur per guardar sch’els han pajà la taglia per la Svizra, ed i haja era dà controllas da lavur nunlubida. Plinavant hajan ins fatg controllas, sche generaturs da forza electrica vegnan betg duvrads cun ieli da stgaudar ch’è pli bunmartgà che diesel. Tar tut ils cas numnads hajan ins constatà intgins fallaments, ha ditg Martin Tschirren. Differentas persunas sajan vegnidas denunziadas.
Bilantscha mediocra dals organisaturs
Ils organisaturs dal festival «Summer Nevers Ends» fan ina bilantscha mediocra. Bain saja l’atmosfera sin l’areal da festa stada fitg buna, ma il dumber da 10’000 visitaders n'haja ins betg cuntanschì. Circa 9’000 visitaders sajan stads presents. Sco quai che Corinne Rageth, la presidenta da l’uniun Klangwerk ch’organisescha il festival ha ditg, na saja il mument betg anc cler, sch’i dettia en dus onns il 10avel festival da Goa a Rona: «L’emprim pajain nus tut ils quints, e guardain sch’igl èn anc avant maun daners». Ins s’accorschia bain la concurrenza dals divers festivals da Goa, pir avant in’emna saja ì a fin il festival da Goa Shankra a Lostallo. Plinavant saja en Svizra fitg char, dad organisar in festival. Perquai che festivals da Goa sajan mintgamai fitg internaziunals, stoppian ins dar adatg da betg avair pretschs memia auts, uschia Corinne Rageth.
Polizia tschiffa dealers
La Polizia chantunala fa en general ina bilantscha positiva dal festival. Il public saja per gronda part stà paschaivel, incaps pli gronds n’haja quai dà nagins. Sin l’areal da festa hajan ins però scuvert divers delicts da drogas, ha ditg il pledader Markus Walser: «Ins ha observà persunas cun quantitads pli grondas da meds narcotics». Differentas persunas vegnian ussa denunziadas. Denunzias haja quai era dà en las differentas controllas da drogas.
RR novitads 17:00
